Presentación solicitudes de creación, modificación e supresión de Departamentos
Este procedemento serve para dar cumprimento ao establecido no artigo 15 do Regulamento de creación, modificación e supresión de departamentos da USC.
Identificación
Código: OI-01/2
Nome: Presentación solicitudes de creación, modificación e supresión de Departamentos.
Clasificación: Organización interna, Reorganización de departamentos, Solicitudes de fusión.
Inicio e instrucións
FINALIDADE
Este procedemento serve para dar cumprimento ao establecido no artigo 15 do Regulamento de creación, modificación e supresión de departamentos da USC, e poder presentar as solicitudes de creación e fusión de departamentos, sempre que os solicitantes cumpran as condicións establecidas.
O escrito de presentación de solicitude estará asinado polos departamentos implicados no procedemento
A solicitude de creación, modificación ou supresión do departamento dirixirase á Vicerreitoría de Organización Académica e Persoal Docente e Investigador. Na solicitude, ademais dos datos identificativos dos axentes promotores da iniciativa e do tipo de solicitude, deberanse cumprimentar os seguintes extremos:
• As razóns que xustifiquen a creación ou modificación do departamento.
• A denominación proposta para o departamento e a súa sede.
• A relación da totalidade do Persoal Docente e Investigador que o compoñería, con indicación da súa área de coñecemento.
• A adscrición de prazas vacantes dotadas orzamentariamente.
• A relación de materias en cuxa docencia participan os membros do departamento.
• A adscrición dos grupos de investigación.
• A adscrición de representantes electos nos órganos colexiados que corresponda.
• A estrutura de goberno provisoria.
• A determinación da xestión económica e do reparto dos créditos orzamentarios.
• A adscrición do material inventariable e espazos ao departamento creado ou modificado.
Non será preciso introducir a información que se atope a disposición da Vicerreitoría de Organización Académica e Persoal Docente e Investigador, da Xerencia ou da Vicerreitoría de Investigación e Innovación, e que así se sinala nos propios formularios.
As solicitudes presentadas non poderán ser modificadas a través deste procedemento unha vez rematado o prazo de presentación de solicitude.
O prazo será o establecido mediante Instrución da Vicerreitoría de Organización Académica e PDI.
DESCRICIÓN
O procedemento iníciase cunha solicitude que realizan os axentes promotores a través do formulario correspondente, debendo seguir os pasos que se relatan a continuación:
1.- Descargar e encher o formulario de solicitude que se atopa entre os documentos asociados a este procedemento.
2.- Gardar o formulario no propio computador.
3.- Para este paso, é preciso dispoñer dun programa de conversión de documentos a formato PDF, (existen numerosas versións gratuítas accesibles en internet). Deberá premer en "Arquivo", a continuación en "Gardar como" e seleccionar o formato PDF, ou ben, premer en "Imprimir" e seleccionar como impresora calquera que converta o documento nese formato.
4.- Ir, dentro do apartado “Servizos persoais” da sede, á opción “Rexistro electrónico” e, despois de encher os datos que se solicitan, xuntar á solicitude os documentos gardados previamente e realizar o rexistro.
A presentación desta solicitude require sinatura electrónica con certificado dixital.